उदयपुर, १० साउन । आन्तरिक राजस्व विभाग करदाता सेवा कार्यालय, गाइघाटले जिल्लाको प्रमुख ब्यापरिक केन्द्र कटारीमा शिविर सञ्चालन गरेर कर संकलन गरेको छ ।

कटारीका ब्यवसायीहरुलाई राजस्व बुझाउन सहज होस् भन्दै कटारीमा १ दिन कर शिविर सञ्चालन गरिएको हो । शिविरमा विभिन्न व्यवसायीहरुले आन्तरिक राजस्व विभाग करदाता सेवा कार्यालय उदयपुर गाइघाटको सेवा प्रदान गर्न शिविर राखिएको कार्यालय प्रमुख एवं कर अधिकृत सुमन बुढाथोकीले बताए ।

 

कार्यालयको सेवा पहुच भन्दा टाढा रहेका करदाताहरुलाई सेवा प्रवाहमा सहजता ल्याउनको लागि शिविर आयोजना गरिएको कार्यालय प्रमुख बुढाथोकीको भनाइ छ ।

शिविरमा कर संकलन, खाता प्रमाणित, भ्याटमा दर्ता, कारोवार परिर्वतन, अन्तशूल्क संकलनलगायतका कामहरु गरिएको कर अधिकृत बुढाथोकीले बर्ता । करदाताहरुले विभिन्न व्यवसायहरु कसरी सञ्चालन गर्ने ?

कर कहिले तिर्ने ? आयकरमा भएको संसोधन, छूट तथा सुविधालगायतका विषयहरुमा अन्तक्र्रिया समेत भएको कर अधिकृत बुढाथोकीले बताए ।

यहाँका व्यवसायीहरुलाई कर तिर्न निकै समस्या रहेकाले शिविरबाटै कर तिर्ने ब्यवस्था गर्न शिविर राखिदिन कार्यालयलाई आग्रह गरिएको उदयपुर उद्योग वाणिज्य संघ कटारीका अध्यक्ष पुष्कर खड्काले बताए ।

व्यवसायीको हितका लागि आगामी दिनमा पनि यस्तै शिविरहरु सञ्चालन गर्न खोजिरहेको खड्काले बताए । यहाँका व्यवसायीहरु विभिन्न व्यवसायको कर तिर्न जिल्ला सदरमुकाम गाइघाट जानुपर्ने बाध्यता रहेको छ । घरदैलो मै सेवा पाउदा यवसायीहरुले खुसी व्यक्त गरेका छन् ।

कटारीमा चलेको शिविरमा कर बुझाउन आएका कटारी नगरपालिका वडा नम्बर १४ घुर्मी निवासी नारायण प्रसाद धमलाले करदाता शिक्षा नहुँदा धेरै साना व्यवसायीहरु मार्कामा परेको बताए ।

कहिले कर तिर्ने ? कुनकुन व्यवसाय गर्दा कति कर तिर्नु पर्छ ? भन्ने जस्ता बिषयमा अन्योल रहेकोमा शिविरबाट प्रष्ट भएको धमलाले बताए ।

व्यवसायीहरुले शिविर भन्दा पनि यहाँ कर संकलन गर्ने कार्यालय नै स्थापना भए साना व्यवसायीहरु कर संकलन गर्ने तथा कर तिर्ने जस्ता बिषयमा जानकारी राख्न पाउने उनको भनाइ छ ।

उक्त शिविरमा ७ सय ५५ जनाले सेवा लिएका थिए । कटारीका व्यवसायीहरुले गाइघाट पुगेर कर तिर्न जाँदा प्रति व्यक्ति ४ हजार भन्दा बढी रकम खर्चिनु पर्ने बाध्यता थियो ।

यसरी कटारीमै शिविर सञ्चालन गरेर राजस्व संकलन गर्दा यहाँका व्यवसायीहरुको ठूलो आर्थिक रकम पनि बचत भएको छ । शिविरबाट व्यवसायीहरुले कर तथा राजस्व तिरेका थिए ।

व्यवसायीबाट अन्त शुल्क नवीकरणबाट २० लाख ३० हजार, आयकर ३ सय ६३ जना बाट ३ लाख ६३ हजार गरेर २३ लाख ९३ हजार राजस्व संकलन भएको कर अधिकृत सुमन बुढाथोकीले बताए ।

(यो समाचार न्यूज २४ १० श्रावण २०७७  मा प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन  )