‘करले जनता आतंकित’

काठमाडौँ — राष्ट्रिय सभामा विशेष समयमा बोल्दै सांसदहरूले कर बढोत्तरी, बाढीपहिरो र सडकको दुर्दशाबारे सरकारको ध्यानाकर्षण गराएका छन् ।
कांग्रेस सांसद अनिता देवकोटाले स्थानीय सरकारले विभिन्न शीर्षकको करमा गरेको कैयौं गुणाको बढोत्तरीले जनता आतंकित भइरहेको बताइन् ।

‘कर बढाउँदा जनताले थेग्न सक्छन् कि सक्दैनन्, हेक्का राखेको देखिएन,’ उनले भनिन्, ‘तीन तहको सरकारबीच समन्वय अभाव छ । केन्द्र सरकारले समेत समन्वयको प्रयास नगर्दा समस्या उत्पन्न भएको छ ।’ कर आतंकले जनताको धैर्य टुट्न सक्ने उनले उल्लेख गरिन् ।

संघीय समाजवादी फोरमका रामपृत पासवानले पूर्वपश्चिम राजमार्गको नवलपुरबाट सर्लाहीको सदरमुकाम मलंगवा जोड्ने सडक वर्षौं भइसक्दा पनि मर्मत हुन नसकिरहेको तर्फ ध्यानाकर्षण गराए । उनले काममा ढिलासुस्ती गर्ने ठेकेदारलाई कारबाही गर्ने, ठेक्का तोड्ने कुरा कहाँ हरायो भन्ने प्रश्न गरे ।

नेकपाका कालिबहादुर मल्ल र भैरवसुन्दर श्रेष्ठले जाजरकोटमा भेरी नदी थुनिने गरी गएको पहिरोबारे केन्द्रस्तरबाट स्थलगत अवलकोन गरी समस्यामा परेका जनतालाई राहत दिन माग गरे । रमेशप्रसाद यादवले बारा जिल्लामा पसाहा खोलाको बाढीले पुर्‍याएको क्षतिबारे ध्यानाकर्षण गराए ।

सांसद धनकुमार खतिवडाले कतिपय जिल्लामा बलात्कार घटनामा सरकारबाट भएका कारबाही सदनलाई जानकारी गराउन माग गरिन् । सांसद विमला राईले भूकम्पपछि निर्मित विद्यालयमा शौचालय निर्माण नगरिएकामा आश्चर्य व्यक्त गर्दै डिजाइनमा भएको त्रुटि सच्याउनुपर्नेतर्फ ध्यानाकर्षण गराइन् ।

सांसद नैनकला ओझाले मोरङको लेटाङमा विद्यालयको पानीट्यांकीमा विषादी मिसाइएको विषयमा अनुसन्धान गरी दोषीलाई कारबाही गर्न माग गरिन् ।

बैठकमा कानुन न्याय तथा संसदीय मामिलामन्त्री भानुभक्त ढकालले अपराधपीडित संरक्षण विधेयक २०७५ पेस गरेका थिए । अपराधपीडितको हक संरक्षण, क्षतिपूर्ति र पुन:स्थापनाका लागि उक्त विधेयक प्रस्ताव गरिएको उनले बताए । राष्ट्रिय सभाका चारवटा समितिका सभापतिको चयन भदौ ३ गतेका लागि तोकिएकामा भदौ १३ गतेका लागि सारिएको छ ।

यो समाचार कान्तिपुर राष्ट्रिय दैनिक  बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links