थप ३६ उद्योग भ्याटको दायरामा


सरकारले थप ३७ प्रकारका उद्योगलाई मूल्य अभिवृद्धि कर (भ्याट)को दायरामा ल्याउने भएको छ । अर्थमन्त्री डा. युवराज खतिवडाले संसदमा पेश गरेको आर्थिक विधेयकअनुसार देशभर सञ्चालनमा रहेका १२ प्रकारका उद्योग व्यवसाय र महानगरपालिका तथा उपमहानगरपालिकाभित्र सञ्चालित थप २४ वटा उद्योग व्यवसायलाई भ्याटको दायरामा ल्याएको हो । 
विभागले रेष्टुरेन्ट एण्ड बार, आइसक्रिम उद्योग, कलरल्याब, बुटिक, सुटिङ सर्टिङसहितको टेलरिङ व्यवसायलाई पनि अनिवार्यरूपमा भ्याटमा दर्ता हुन पत्राचार गरेको छ । यस्तै, शिक्षण संस्था वा स्वास्थ्य संस्था वा अन्य निकायमा युनिफर्म आपूर्ति गर्ने फर्मलाई अनिवार्य रूपमा भ्याटमा दर्ता भएर मात्रै कारोबार गर्न निर्देशन दिएको विभागले जनाएको छ । 
विभागका अनुसार सरकारले देशैभर सञ्चालनमा रहेका इँटा उद्योग, मदिरा विक्रेता, वाइनसप, सफ्टवेयर, ट्रेकिङ, -याफ्टिङ व्यवसाय, अल्ट्रालाइट फ्लाइट, प्याराग्लाइडिङ, पर्यटक सवारी पनि भ्याटको दायरामा आएका छन् । क्रसर उद्योग, बालुवा खानी, ब्युटी पार्लर, पार्टी प्यालेस, कलरल्याब, चुनढुंगा उद्योगलगायतका उद्योग व्यवसायलाई भ्याटमा समावेश गरेको आन्तरिक राजस्व विभागले जनाएको छ । औसतभन्दा बढी अर्थात २९.८ प्रतिशत राजस्व वृद्धिको लक्ष्य पूरा गर्न सरकारले कर छल्ने व्यावसायीविरुद्ध खरोरूपमा उत्रिने संकेत गरेको छ । विभागले महानगरपालिका र उपमहानगरपालिकाभित्र सञ्चालित हार्डवेयर, सेनिटरी, फर्निचर, फिक्स्चर, फर्निसिङ अटोमोबाइल्स, मोटरपार्टस इलेक्ट्रोनिक्स, मार्बल, शैक्षिक परामर्श, डिस्कोथेक, हेल्थ क्लबपनि भ्याटको दायरामा तानेको छ । 
अब मसाज सेन्टर, थेरापी क्लब, व्युटीपार्लर, क्याटरिङ, पार्टी प्यालेस व्यवसाय, पार्किङ सेवा, मेसिनरी उपकरण प्रयोग भएको ड्राइक्लिनर्स पनि भ्याटमा दर्ता हुनुपर्नेको सूचिमा छन् । विभागले प्रस्तावित नयाँ क्षेत्रलाई भ्याटको दायरामा ल्याउन कर कार्यलयहरूलाई पत्राचार समेत गरेको छ । सरकारले आगामी आर्थिक बर्षमा राजस्वको दायरा फराकिलो पार्ने क्रममा यी नयाँ क्षेत्रहरूलाई भ्याटको दायरामा तानेको विभागको दाबी छ । 
संघीयता कार्यन्वयनका लागि धेरै बजेटको आवश्यकता परेपछि सरकारले नयाँ क्षेत्रलाई पनि करको दायरामा ल्याएको हो । सरकारले आगामी आर्थिक वर्षमा ८ खर्ब ३१ अर्ब रुपैयाँ राजस्व संकलनको लक्ष्य लिएको छ । बजेटमा लिइएको राजस्वको लक्ष्य पूरा गर्न नै कर प्रणालीमा ठूलो सुधार गर्न भन्दै सरकारले कर लाग्ने नयाँ क्षेत्रको खोजी गरिरहेको अर्थमन्त्रालयले जनाएको छ । अर्थमन्त्री खतिवडाले कर छल्नु वित्तीय अपराधबराबर भएको भन्दै शंका लाग्ने व्यावसायीको बैंक खाता र कर कार्यालयमा बुझाएको विवरण भिडाएर हेर्ने बताउँदै आएका छन् । बैंक खाता गोप्य हुने नाममा सरकारले कर छल्नेलाई उन्मुक्ति नदिने भन्दै गोपनियताको दायरा बाहिर गइ छानबिन अघि बढाउने अर्थको तयारी छ । 
अर्थले व्यक्तिको पनि बैंक कारोबार र आम्दानी जाँच गर्ने र त्यसका लागि डिजिटल प्रणालीको भरपुर उपयोग गर्ने बताएको छ । बजेटमार्फत सरकारले आगामी आर्थिक वर्षका लागि व्यक्तिगत आयकरको स्ल्याब हेरफेर गरेको छ । धेरै कमाउनेसँग धेरै कर असुल गर्ने प्रगतिशील कर प्रणाली लागू गरिएकामा यसबाट कर छल्ने प्रवृत्ति मौलाउने भन्दै कतिपयले विरोध गरेका छन् ।


यो समाचार  कारोबार दैनिक बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links