पटके सवारी कर विवाद अदालतसम्म

१० माघ, बुटवल । रुपन्देहीको सैनामैना नगरपालिकाले उठाएको पटके सवारी कर विवाद अदालतसम्म पुगेको छ ।

प्रदेश सरकारको नदीजन्य पदार्थ व्यवस्थापन कार्यविधि विपरीत नगरपालिकाले प्रति टिप्पर ५ सय ६५ रुपैयाँ पटके कर लिएको दावीसहित भुवनेश्वरी कन्स्ट्रक्सनका सञ्चालक श्यामनारायण अधिकारीले सर्वोच्चमा रिट दायर गरेका थिए ।
 

रिटउपर पुस ३० गते सर्वोच्च अदालतका न्यायाधीश अनिलकुमार सिन्हाको एकल इजलासले पटके सवारी कर नेपालको संविधान, स्थानीय सरकार सञ्चालन ऐन २०७४ र प्रदेश ५ सरकार नदीजन्य पदार्थ व्यवसथापन कार्यविधि विपरीत रहेको ठहरसहित उक्त कर नउठाउन नगरपालिकाको नाममा उत्प्रेषणयुक्त परमादेश जारी गरेको थियो ।

तर नगरपालिकाले अदालतको आदेशको बेवास्ता गर्दै ठेकेदारले पुनः पटके सवारी कर असुल्न नछाडेको भन्दै व्यवसायी अधिकारीले अदालतको आदेश पालनाको माग गर्दै नगरपालिकाका मेयर चित्रबहादुर कार्की र कर उठाउने ठेकेदार कृष्ण पोखरेलविरुद्ध अदालतको अपहेलनामा सजाय माग गर्दै पुनः सर्वोच्च अदालतमा निवेदन दिएका हुन् ।

निवेदकले गैरकानुनी कर असुल्ने र अदालतको अपहेलना गर्ने मेयर कार्की र ठेकेदार खरेललाई सर्वोच्च अदालत नियमावली २०७४ नियम ५९ को कार्यविधि अनुसार सर्वोच्चमा झिकाई बयान लिई २०७३ को दफा १७ (२) वमोजिम एक वर्ष कैद र १० हजार जरिवानाको सजाय माग गरेका छन् ।

ठेकेदारले रा १ ख १०७२, रा १ ख ८८१, रा १ ख ११३६, रा १ ख ८२७ नम्बरका टिप्परबाट गैरकानुनी कर असुलेको निवेदनमा उल्लेख गरेका छन् ।

ठेकेदारले व्यवसायी अधिकारीबाट तीन लाख १० हजार रुपैयाँ पटके सवारी कर वापत असुल हुन बाँकी रहेको बताएपनि गैरकानुनी रुपमा लगाइएको कर आफूले नतिर्ने अधिकारीले बताएका छन् ।

सैनामैनामा बाँसगढी– सूर्यपुरा– कञ्चन पूल, बुद्धनगर–किशुली कृषि सडक, बाँसगढी भित्रको कालोपत्रे सडक, बुद्धनगर–मलमलालगायत नगरका भित्री सडक र कच्ची सडकमा समेत गरेर दैनिक करिब सय वटा टिप्पर तीन–चार पटक ओहोर दोहोर गर्छन् ।

जसबाट दैनिक २ लाख रुपैयाँसम्म कर असुली हुने गरेको टिप्पर व्यवसायीहरु बताउँछन् । यसअघि पाल्पामा पनि पटके सवारी कर उठाएको भन्दै एक गाउँपालिकाविरुद्ध सवारीधनीले मुद्दा दायर गरेका थिए ।

हेर्नुहोस् सर्वोच्चको परमादेश


यो समाचार  अनलाइनखबर डटकम बाट साभार गरिएको हो । यो समाचार तयार गर्नमा नेपाल ट्याक्स अनलाइनको कुनै संलग्नता छैन।

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links