कावासोती । नवलपुरको कावासोतीमा कर कार्यालय स्थापना हुने भएको छ । नवलपुरमा कर कार्यालय नहुँदा यहाँका उद्योगी तथा व्यवसायी कर तिर्न चितवनको भरतपुर जानुपर्ने बाध्यता छ । कर कार्यालय स्थापना हुने भएपछि यहाँका व्यवसायीहरू उत्साहित भएका छन् ।

होटल तथा रेष्टुरेण्ट व्यवसायी सङ्घ नवलपुरका अध्यक्ष बालकृष्ण पौडेलले जिल्लामा कर कार्यालय नहुँदा निकै सास्ती बेहोर्नुपरेको बताए । उद्योग वाणिज्य सङ्घको पहलमा कर कार्यालय स्थापना हुन लागेको हो । नवलपुर उद्योग वाणिज्य सङ्घको अध्यक्षमा चुनिएलगत्तै अध्यक्ष डाँसुराज पोखरेलले कर कार्यालय स्थापना गर्ने कामलाई प्राथमिकतामा राख्दै आएका थिए ।

‘निरन्तरको प्रयासपछि सबैको पहलमा कर कार्यालय ल्याउन सफल भएका छौं,’ पोखरेलले भने, ‘अब कर तिर्न जिल्ला बाहिर जानुपर्ने उद्योगी व्यवसायीको बाध्यता हट्ने भएको छ’ । उनका अनुसार कावासोतीमा कर कार्यालयका लागि घर खोज्ने काम भइरहेको र छिट्टै कार्यालय स्थापना भई काम सुचारु हुनेछ ।

वार्षिक कार्ययोजना पारित
नवलपुर उद्योग वाणिज्य सङ्घ नवलपुरले आर्थिक वर्ष २०७५/७६ का वार्षिक कार्ययोजना पारित गरेको छ । सङ्घका अध्यक्ष पोखरेलको अध्यक्षतामा बसेको पूर्ण बैठकले २७ बुँदे वार्षिक योजना पारित गरेको हो । सङ्घले गर्ने कार्यहरूलाई छिटो, छरितो र मर्यादित तवरले सेवा प्रवाह गर्न कार्यालयमा सफ्टवेयर जडानलाई तीव्रताका साथ अगाडि बढाइने भएको छ । उद्योग वाणिज्य महासङ्घ गण्डकी प्रदेश र केन्द्रबाट सम्बन्धन प्राप्त नगरेकाले सम्बन्धन दिलाउन तदारुकताका साथ आवश्यक पहल गर्ने निर्णय भएको पोखरेलले जानकारी दिए ।

यो समाचार आर्थिक अभियान राष्ट्रिय दैनिक  बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |