जीबन बीमा गर्दा बार्षिक ५० हजार आयकर छुट दिन गृहकार्य

जीबन बीमाको दायरा बढाउन र लगानीयोग्य पुँजी जुटाउन भन्दै जीबन बीमा गर्ने ब्यक्तिलाई बार्षिक ५० हजार रुपैयाँ आयकर छुट दिने गृहकार्य सुरु भएको छ ।

अहिलेसम्म जीबन बीमा गराएका ब्यक्तिहरुले बार्षिक २० हजार रुपैयाँ आयकर छुट पाउँदै आएकोमा यस्तो रकम बढाएर ५० हजार रुपैयाँ पुर्याउन बीमा समितिले छलफल थालेको हो ।

जीबन बीमा कम्पनीहरुले बार्षिक १ लाख रुपैयाँसम्म आयकर छुट दिन माग गरिरहेको समयमा समितिले बार्षिक ५० हजार रुपैयाँसम्म छुट दिन सकिने गरी आन्तरिक र अर्थमन्त्रालयसँग छलफल गरेको हो । अहिलेसम्म कुनै निर्णय नभएपनि २० हजारको सीमालाई बढाएर ५० हजार रुपैयाँ पुर्याउने गरी छलफल चलिरहेको समिति स्रोतले जानकारी दियो ।

‘जीबन बीमा गराएका ब्यक्तिलाई बार्षिक २० हजार रुपैयाँ आयकर छुट दिइदै आएको छ, यो सीमालाई बढाएर १ लाख रुपैयाँसम्म पुर्याउनु पर्ने माग आएको छ, तर अहिले ५० हजार रुपैयाँसम्म गर्दा ठीक हुन्छ होला भनेर त्यही अनुरुप छलफल गरिरहेका छौं,’ समिति स्रोतले क्लिकमाण्डूसँग भन्यो ।

कर छुटको सीमा अर्थमन्त्रालयले तय गर्छ । बीमा समितिले सिफारिस मात्रै गर्ने हो । यसकारण यति रकमको कर छुट हुने भयो भन्ने यकिन हुन आगामी आर्थिक बर्षको बजेटसम्म कुनुपर्ने हुन्छ ।

जीबन बीमा गर्ने ब्यक्तिहरुलाई बार्षिक १ लाख रुपैयाँसम्मको आयकर छुट दिनु उपयुक्त हुने नेपाल लाइफ इन्स्योरेन्स कम्पनीका प्रमुख कार्यकारी अधिकृत विबेक झा बताउँछन् ।

‘छिमेकी देशहरुको अभ्यास, नेपालीको आम्दानी र खर्चको अबस्था जस्ता कारणले अहिले जीबन बीमा गर्ने ब्यक्तिहरुलाई बार्षिक १ लाख रुपैयाँसम्म आयकर छुट दिने ब्यवस्था गर्नु उचित हुन्छ, यस्तो ब्यवस्थाले राज्यलाई हानी हुदैन, थप फाइदा नै हुन्छ,’ प्रमुख कार्यकारी अधिकृत झाले क्लिकमाण्डूसँग भने ।

करको दायरा बढाएर कर संकलन बृद्धि गर्न आयकर छुटको सीमा १ लाख रुपैयाँ पुर्याउन उचित हुने उनको भनाइ छ । जीबन बीमा गर्दा छुट पाइने आयकरको सीमा बढाउँदा जीबन बीमाप्रतिको आकर्षण बढ्ने र त्यसले लगानी गर्नको लागि पैसाको ब्यवस्था हुने झा बताउँछन् ।

‘आयकर छुटको सीमा बढाएर धेरै ब्यक्तिलाई आकर्षित गर्न सकियो भने त्यसले कर घटाउनुको साटो बढाउँछ, यस्तै बीमा कम्पनीमा संकलन हुने बीमा शुल्कले आर्थिक विकास र पूर्वाधार निर्माणमा लगानी गर्न सकिने भएकोले राज्यलाई दोहोरो फाइदा हुन्छ,’ झाको भनाइ छ ।

जीबन बीमा गर्ने ब्यक्तिहरुले तिरेको बीमा शुल्कबाट बीमा कम्पनीहरुले राज्यलाई कर तिर्छन् । यस्तै कम्पनीहरुले नाफा गरेमा नाफाको २५ प्रतिशत आयकर तिर्नुपर्छ ।

जीबन बीमा गराउने बीमा अभिकर्ताहरुले पाउने कमिसनमा १५ प्रतिशत अग्रिम कर कट्टी गरेर भुक्तानी गर्ने गरिएको छ । बीमा गराउने ब्यक्तिले पनि भुक्तानी अबधि पूरा भएर बीमा रकम फिर्ता लिदा कमाइको ५ प्रतिशत कर तिर्नुपर्छ । यसैकारण जीबन बीमा गराउने ब्यक्तिहरुलाई आयकरमा दिइने छुटको सीमा बढाएर प्रोत्साहन दिन बीमा कम्पनीहरुले माग गर्दै आएका हुन् । अहिले बीमा कम्पनीहरुले उठाएको बीमा शुल्कबाट १ खर्ब ८० अर्ब रुपैयाँ जति लगानी गरेका छन् ।

यो समाचार clickmandu.com  बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links