काठमाडौँ । कच्चा पदार्थ भन्दै केही ब्यापारीहरुले झ्याल ढोकाको तयारी यूपीभीसी प्रोफाइल आयात गरी बिक्री वितरण गर्दा नेपालमै उत्पादन गरेर बिक्री गर्ने व्यवसायी भने मारमा परेका छन् । 

केही व्यवसायीले कच्चा पदार्थको नाममा गलत सांकेतिक कोड प्रयोग गरी तयारी समान नेपाल भित्र्याएर बिक्री बितरण गर्दै आएको बुझिएको छ । सांकेतिक कोड ३९२५.२०.०० कोड प्रयोग गर्नु पर्नेमा ३९१६.१००० र ३९१६.२०.०० प्रयोग गरी आधा भन्दा धेरै भन्सार शुल्क छलेर सामान ल्याउँदै सस्तोमा बिक्री गर्दा आफूहरु प्रभावित भएको पीडित व्यवसायीहरु बताउँछन् । 

सांकेतिक कोड ३९२५.२०.०० भएको सामानको अन्तशुल्क प्रतिटन १८ सय देखि १९ सय अमेरिकी डलर (३० प्रतिशत) तिर्नु पर्नेमा ३९१६.१००० र ३९१६.२०.०० प्रयोग गरी ९ सयदेखि ११ सय अमेरिकी डलर (१५ प्रतिशत) मात्र भन्सार शुल्क तिरेको पाइएको छ । 

सरकारी निकायले प्रभावकारी अनुगमन नगर्दा राज्यलाई समेत करोडौँ रुपियाँ भन्सार राजश्व घाटा लागिरहेको पाइएको छ । अनियमिता गर्ने केही व्यवसायीको गतिबिधिले गर्दा स्वदेशी उत्पादनले प्रतिष्पर्धा गर्न नसकी उद्योग नै बन्द गर्नु पर्ने अवस्थामा पुगेको व्यवसायी बताउँछन् ।  

कच्चा पदार्थ आयात गरी उत्पादित समान र विदेशमै तयार भएका समान बीच प्रतिष्पर्धा गर्न नसकिने अवस्था रहेकाले उद्योग नै बन्द गर्नु पर्ने अवस्था सिर्जना भएको हो । पीडित व्यवसायीका अनुसार सरकारी निकायले थाहापाएर पनि यस्तो कार्यलाई नियन्त्रण नगरेको र नेपालमा उत्पादित समानलाई प्रोत्साहन गर्नु पर्नेमा निरुत्साहित गरेको एक पीडित व्यवसायीले गुनासो गरे । 

नेपालमा निर्माण सामाग्री उत्पादन गर्ने कम्पनीहरुले बिदेशबाट कच्चा सामान आयात गरी सामाग्री उत्पादन गर्दछन् । सरकारले चालु आर्थिक वर्षको बजेटमा स्वदेशी उद्योगलाई प्रोत्साहन गर्ने भन्दै औद्योगिक कच्चा पदार्थको आयात शुल्क केही घटाएको थियो । 

सरकारले कच्चा पदार्थको भन्सार दर तयारी मालवस्तुभन्दा कम्तीमा एक तह कम गर्ने निर्णय गरेको थियो । तर सरकारको यो कुरा व्यवसायीको आँखामा छारो हाल्ने काम मात्र भएको पीडित व्यवसायीले गुनासो गरे । 

(यो समाचार  कर्पोरेट नेपाल १९ फाल्गुन२०७७  मा प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन )