काठमाडौं, भदौ २ । राजस्व अनुसन्धान विभागले अब सामान ओसार पसार गर्दा अर्थात एक ठाउँबाट अर्को ठाउँका लैजादा बिल विजक दर्ता गरेरमात्र लैजान पाउने व्यवस्था गर्न लागेको छ ।

व्यवसायीहरूले सामानको असली बिल लुकाउने, च्यात्ने तथा राजस्व प्रशासनलाई झुक्याउने काम गरेकाले सामानको बिल अनलाइनमा अनिवाय दर्ता गर्नुपर्ने व्यवस्था गर्न लागिएको राजस्व अनुसन्धान विभागका महानिर्देशक दीर्घराज मैनालीले बताए ।

‘यो व्यवस्थापनका लागि हामी आन्तरिक सफ्टवेयरको विकास गर्दै छौं’, उनले भने–‘सफ्टवेयरको विकासपछि विभागले विकास गरेको सफ्टवेयरमा बिल इन्ट्री नगराई वस्तु ओसारपसार गरेमा कारबाही हुन्छ ।

‘यसका लागि हामी क्युआर कोर्डको विकास गर्छौ,’ उनले भने–‘यो कोर्डमार्फत सम्बन्धित व्यवसायी तथा विभाग प्रशासनले जानकारी लिन सक्छ ।’ बिल विजक जारी भएको केन्द्रीय तथ्यांक प्रणालीमा देखा पर्दछ ।

अहिले व्यवसायीले आफूले खरिद गरेको सामान अर्को ठाउँमा पु¥याउँदा बिल हराएको, च्यातिएकोजस्ता वहान बनाउँदै राजस्व छल्ने काम गरेका छन् । यसो भएपछि प्रशासनले चाहेको ठाउँमा बिल र सामानको ट्याली गर्न पाउने भएकाले पनि यसबाट राजस्व चुहावट नियन्त्रण हुने बताइएको छ ।

यसले करको दायरा फराकिलो बनाउनुका साथै बिल विजक जारी हुने बित्तिकै अनलाइनमा दर्ता गर्नुपर्ने भएकोले राजस्व ढाट्ने तथा छल्ने प्रवृत्तिको अन्त्य हुने महानिर्देशक मैनालीले बताए ।

हुनत अहिले पनि सामान खरिद गर्दा जारी भएको बिल सामानसँगै लिएर हिड्नुपर्ने व्यवस्था छ । तर, यसको प्रभावकारीता त्यति देखिएको छैन । बिल विजक सफ्टवेयरमा इन्ट्री गर्नुपर्ने भएपछि बिल विजक च्यातेर फाल्ने प्रवृत्तिको अन्त्य हुने मैनालीले बताए ।

साथै विभागले चालू आवमा राजस्व छलि हुने जोखिमका क्षेत्रहरूको पहिचान गर्नेछ । राजस्व चुहावटका सूचनाको खोजी गर्ने, यस विषयमा अध्ययन अनुसन्धान र विश्लेषण गर्ने भएको छ ।

‘भन्सार कार्यालयबाट ठूला अंकमा राजस्व चुहावट हुने गरेको भन्दै उनले भने ‘एउटै ट्रकबाट एक करोड रुपैयाँसम्मको राजस्व छलि भएको छ ।’ ब्रान्डेड सामान कम मूल्यमा भन्सार मूल्यांकन भएको छ । यस्ता सामानको कम मात्र राजस्व तिर्ने तथा उस्तै परे तिदै नतिर्ने संस्कार व्यवसायीमा देखियो’, उनले भने–‘कतिपय सामानमा भने ब्रान्डेड सामानको लोगो लगाएर उपभोक्ता ठग्ने काम समेत भएको छ ।’

यो समाचार  आर्थिकन्यूज डटकम  बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |