खोटाङका होटेल व्यवसायीले लकडाउन अवधिभरको कर छूट दिन माग गरेका छन् । होटेल व्यवसायी संघ, खोटाङले सोमवार जिल्ला प्रशासन कार्यालयमा ७ बुँदे ज्ञापनपत्र बुझाउँदै कर छूट तथा राहतको व्यवस्था गर्न माग गरेका छन् । तीन महीनादेखिको लकडाउनका कारण होटेल व्यवसायी, होटेल व्यवसाय क्षेत्रमा संलग्न कर्मचारी र मजदुरले आर्थिक संकट खेप्दै आएको भन्दै उनीहरूले सो माग गरेका हुन् ।

उनीहरूले घर भाडामा लिएर व्यवसाय सञ्चालन गरिरहेका व्यवसायीलाई ५० प्रतिशत घरभाडा र घरबहाल कर छूटको व्यवस्था गर्न, होटेल व्यवसायी, कर्मचारी र मजदुरलाई संघी, प्रदेश र स्थानीय सरकारबाट सामाजिक सुरक्षा कोष वा अन्य स्रोतबाट आर्थिक प्याकेजको व्यवस्था मिलाउन लगायत माग गरेका छन् ।

होटेल व्यवसायी संघ खोटाङका अध्यक्ष जयप्रसाद राई ‘जेपी’का अनुसार होटेल व्यवसायीले राज्य तथा स्थानीय सरकारबाट कार्ययोजना बनाएर बन्दाबन्दीको समय अवधिभरको बिजुली र खानेपानीको महशुल, संघीय तथा स्थानीय सरकारलाई तिर्नुपर्ने विभिन्न किसिमका कर तथा नवीकरण शुल्क छूट गराउन माग गरेको बताए । अधिकांश व्यवसाय भाडाका घरमा सञ्चालनमा रहेको भन्दै उनले व्यवसाय सञ्चालन हुँदा पनि घरभाडा र बैंकको ब्याज तिर्न व्यवसायीले नसक्ने बताए ।

बैंकको ब्याजमा ५० प्रतिशत छूटका साथै कम्तीमा १ वर्षसम्म ब्याज तथा मासिक किस्ता तिर्न नपर्ने व्यवस्था गर्न पनि सरकारसँग व्यवसायीले माग गरेका छन् । यस्तै पुनः व्यवसाय सञ्चालनका लागि तीन ओटै तहका सरकारबाट सहुलियत ब्याज दरमा बैंकिङ कर्जाको व्यवस्था मिलाउन पनि उनीहरूले आग्रह गरेका छन् ।