कर प्रशासनमा ब्यापक हेरफेरः भन्सार र राजस्व कार्यालय थपिए

नयाँ मध्यमस्तरीय करदाता कार्यालय पनि खुल्ने

२१ असार, काठमाडौं । सरकारले कर तथा राजस्व प्रशासनमा ब्यापक हेरफेर गरेको छ । मन्त्रिपरिषदको बुधबार बसेको बैठकले अर्थमन्त्रालयको नयाँ प्रशासनिक संरचनालाई स्वीकृत गरेको छ । यसअनुसार अब मुख्य भन्सार कार्यालयहरु थप भएका छन् भने आन्तरिक राजस्व कार्यालयको संख्या पनि बढेको छ । साउनबाट नयाँ संरचनाअनुसार सेवाको थालनी हुनेछ ।

काठमाडौं उपत्यकामा रहेका १३ वटा करदाता सेवा कार्यालयका आन्तरिक राजस्व कार्यालयमा रुपान्तरण भएका छन् । काठमाडौंका तीनवटा आन्तरिक राजस्व कार्यालय एउटै बनाएर अब मध्यमस्तरीय ‘मझाैला ठूला करदाता कार्यालय’ बन्ने भएका छन् । भक्तपुर र ललितपुरका अान्तरिक राजस्व कार्यालय यथावत रहनेछन् ।
 

ठूला करदाता कार्यालयलाई यथावत राखिएको छ । मझौलास्तरका करदाताहरुका लागि नयाँ संरचनाअनुसार अब सेवा प्रदान गरिने राजस्व सचिव शिशिरकुमार ढुंगानाले जानकारी दिए ।

आगामी वर्षमा सरकारले चालु वर्षको भन्दा झण्डै ३५ प्रतिशत बढी राजस्व उठाउने लक्ष्य लिएको छ । त्यसलाई भेट्ने गरी कर प्रशासनको संरचनाहरु परिवर्तन गरिएको हो ।

यसैगरी अब ५ वटा छोटी भन्सार कार्यालयहरुलाई अब भन्सार कार्यालयमा परिणत गरिने भएको छ ।

अब झापाको भद्रपुर छोटी भन्सारलाई प्रमुख भन्सार कार्यालयमा परिणत गरिने छ । त्यसैगरी सिराहको ठाडी, रुपन्देहीको महेशपुर, कपिलवस्तुको सुठौली र कैलालीको सति छोटी भन्सार पनि अब मुख्य भन्सार कार्यालयमा परिणत भएका छन् । नेपालमा अब २८ वटा मुख्य भन्सार र १३८ वटा छोटी भन्सारहरु रहनेछन् ।

कर संयन्त्रलाई सबल, सुदृढ र प्रभावकारी बनाउने योजनाका साथ सरकारले कर कार्यालयहरुमा दरबन्दी पनि हेरफेर गरेको छ । यसअनुसार अब बन्ने मझौला करदाताका कार्यालयमा पनि सहसचिवस्तरकै नेतृत्व राखिनेछ ।

‘ठूला करदाता कार्यालयमा परेको चाप घटाउन र मध्यम स्तरका कर संकलन गर्न अब मझौला करदाता कार्यालयहरुले काम गर्छन्,’ ढुंगानाले भने,’अब कर प्रशासनमा केही महत्वपूर्ण परिवर्तनहरु हुन्छन् । त्यसको सकारात्मक प्रभाव कर संकलनमा पनि देखिने विश्वास हाम्रो छ ।’

अब वीरगञ्ज भन्सार र एकीकृत चेकपोष्ट (आईसीपी)लाई हेर्ने गरी सहसचिव नै वीरगञ्ज जाने भएका छन् । आईसीपीसहित सुख्खा बन्दरगाहलाई पनि वीरगञ्ज भन्सारमै गाभ्ने गरी नयाँ संरचना तयार गरिएको छ ।

वीरगञ्ज नेपालको मुख्य भन्सार केन्द्र हो । यहाँबाट संकलन हुने भन्सार राजस्वलाई थप वृद्धि गर्न र त्यहाँको सेवा प्रवाहमा सुधार गर्न त्यहाँ सहसचिव स्तरकै नेतृत्व पठाउन लागिएको हो ।


यो समाचार  अनलाइनखबर डट कम  बाट साभार गरिएको हो | यो समाचार तयार गर्नमा नेपाल ट्याक्स अनलाइनको कुनै संलग्नता छैन |

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links