वैशाख २८, २०७७

काठमाडौँ — अर्थमन्त्री युवराज खतिवडाले यसअघि सञ्चालनमा रहेका आयोजनाहरूको पुन: प्राथमिकीकरण गरेर मात्रै आगामी वर्षको बजेट विनियोजन हुने बताएका छन् । कोरोना भाइरस राेग (कोभिड–१९) को असरले आर्थिक क्रियाकलाप कम भई स्रोत अभाव हुने भए पनि सरकारले आयोजनामा पुनः प्राथमिकीकरण गरेर मात्रै बजेट छुट्ट्याउने उनकाे भनाइ छ ।

‘सार्वजनिक खर्चमा मितव्ययिता अपनाइनेछ,’ संसदमा आइतबार बजेटको सिद्धान्त र प्राथमिकता पेस गर्दै खतिवडाले भने । १५ औं योजनाका लक्ष्य, सन २०३० का लागि संयुक्त राष्ट्रसंघले लागू गरेको दिगो विकासका लक्ष्य, अतिकम विकसित राष्ट्रबाट विकासोन्मुख राष्ट्रमा स्तारोन्नत हुने लक्ष्यसाथ आगामी वर्षको बजेट विनियोजन हुने उनले बताएका छन् ।

सबैजसो लक्ष्यलाई कोरोनाले असर पारिसकेकाले कतिपय लक्ष्य तोकिएकाे मितिमा पूरा नहुने उनकाे भनाइ छ । कोभिड–१९ ले पारेको असर कम गर्न मौद्रिक र वित्तीय उपकरणहरू आउँदो बजेटबाट अघि सार्ने जनाउँदै अर्थमन्त्री खतिवडाले करको दर नबढ्ने तर दायरा बढाइने बताए ।

(यो समाचार  बैसाख  २८ , २०७७ को कान्तिपुर मा  प्रकाशित  लेख  बाट  साभार  गरिएको  हो  । यो  लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन  )