काठमाडौं । ठूला करदाता कार्यालयले ३ दिनमा ४ अर्ब रुपैयाँ राजस्व उठाएको छ । कार्यालयले बिहीबार, शुक्रबार र आइतबारसम्म करिब करिब ४ अर्ब हाराहारीमा राजस्व संकलन गरेको बताएको छ ।

कार्यालयका अनुसार निजी क्षेत्रको सबैभन्दा ठूलो दुरसञ्चार सेवा प्रदायक कम्पनी एनसेलले २५ करोड रुपैयाँ कर बुझाएको छ । त्यसैगरी, दुरसञ्चार प्राधिकरणले १ अर्ब रुपैयाँ राजस्व बुझाएको छ । 

बैंक तथा वित्तीय संस्थाले मात्रै २ अर्ब ६० करोड रुपैयाँ राजस्व बुझाएको कार्यालयले जनाएको छ । यो भनेको कुल बुझाएको राजस्वमध्ये ६५ प्रतिशत हो । ४ अर्ब रुपैयाँमध्ये बाँकी रकम प्राधिकरण, एनसेल र अन्य करदाताले बुझाएका हुन् । 

सरकारले अन्तशुल्क, मूल्य अभिवृद्धि कर (भ्याट) आयकर बुझाउने जेठ २५ गतेको समयसीमालाई असार ७ र असार १५ गतेसम्म सारेको छ । तर, उद्योगी/व्यवसायीले अहिले पनि कर बुझाउन थालेको ठूला करदाता कार्यालयका प्रमुख झलकराम अधिकारीले जानकारी दिए । 

‘सरकारले समयसीमा सारे पनि व्यवसायीले कर बुझाइरहेका छन्,’ उनले भने, ‘लकडाउन भएसँगै केही व्यवसायीको व्यवसाय ठप्प भएकाले उनीहरुले बुझाउने कुरै भएन ।’ 

उद्योगी/व्यवसायीले पनि सक्नेले कर बुझाउनुपर्ने बताइरहेका छन् । नेपाल उद्योग वाणिज्य महासंघका निवर्तमान अध्यक्ष पशुपति मुरारकाले सक्नेले राज्यलाई कर बुझाएर सहयोग गर्नुपर्ने बताए । तर, नसक्नेका हकमा सरकारले हेरिदिनुपर्ने उनको भनाइ छ । 

८० करोड रुपैयाँ भन्दा बढी कारोबार गर्ने प्रतिष्ठानहरु ठूला करदाता कार्यालयअन्तर्गत पर्छन् । ६ सय ८१ करदाता ठूला करदाता कार्यालयको सूचीमा छन् ।


(यो समाचार   क्यापिटल नेपाल मा, २६ जेष्ठ २०७७ प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन  )